گلاسگو (طاہر انعام شیخ) سکاٹ لینڈ کی ممتاز سماجی، سیاسی اور ادبی شخصیت عامر بٹ نے کونسلر حنیف راجہ کی گلاسگو کے ڈپٹی ٹو لارڈ پرووسٹ تعیناتی پر ان کے اعزاز میں پرتکلف عشائیہ دیا۔ شرکت کی۔ اس موقع پر بیلی کونسلر حنیف راجہ نے اپنے خطاب میں بیرون ملک تمام پاکستانیوں پر زور دیا کہ آپ جس ملک میں رہ رہے ہیں اس کی ترقی اور کامیابی میں اپنا بھرپور کردار ادا کریں۔ مقامی سیاست میں بھرپور حصہ لیں اور اپنے پسندیدہ نظریے کے ساتھ کسی بھی سیاسی جماعت میں شامل ہوں۔ حنیف راجہ نے کہا کہ پاکستانی سیاست میں دلچسپی لینا ہمارے وطن سے محبت کو ظاہر کرتا ہے اور یہ ایک فطری بات ہے لیکن عہدوں کے حصول کے لیے بیرون ملک پاکستانی سیاسی جماعتوں کی برانچ بنانا اور اس میں حصہ لینا مناسب نہیں۔ معاشرے کو تقسیم کرنے کے سوا کچھ حاصل نہیں ہوتا۔ اگر ہم اپنی توانائیاں مقامی سیاست کے لیے وقف کر دیں تو یہاں نہ صرف اقتدار کے ایوانوں تک پہنچیں گے بلکہ کونسلر، ممبران پارلیمنٹ، لارڈز، میئر اور وزیر بھی بنیں گے۔ ہم اپنے ملک پاکستان کی بہتر خدمت کر سکتے ہیں، ہم کشمیر اور فلسطین سمیت دنیا بھر میں انسانی حقوق کی خلاف ورزیوں کے خلاف آواز اٹھا سکتے ہیں۔ عامر بٹ، ندیم عظمت اور رانا رشید نے بیلی کونسلر حنیف راجہ کو دوبارہ منتخب ہونے پر مبارکباد دی اور کہا کہ ہمیں امید ہے کہ وہ ماضی کی طرح کمیونٹی کی خدمت کرتے رہیں گے۔ ان رہنماؤں نے حنیف راجہ کو برطانیہ بھر میں مسئلہ کشمیر کو اٹھانے میں خدمات پر خراج تحسین پیش کیا۔ تقریب سے انس رانا، طاہر رانا، رانا محمد خان، عدیم احمد، محمد رمضان، عمران علی اور دیگر نے بھی خطاب کیا۔



































