برمنگھم (نمائندہ جنگ) جدید ٹیکنالوجی کے اس دور میں برطانیہ میں رہتے ہوئے آپ روشن ڈیجیٹل اکاؤنٹس کے ذریعے پیارے وطن پاکستان میں نہ صرف محفوظ سرمایہ کاری کر سکتے ہیں بلکہ پراپرٹی کے کاروبار میں سرمایہ کاری کر کے خاطر خواہ منافع بھی کما سکتے ہیں۔ ان خیالات کا اظہار سردار عدنان رشید قونصل جنرل آف پاکستان اور بینک آف پنجاب کے مارکیٹنگ منیجر نوفل داؤد نے روشن ڈیجیٹل روڈ شو کی تقریب سے خطاب کرتے ہوئے کیا۔ ایک روڈ شو کا انعقاد کیا گیا جس میں اوورسیز کمیونٹی نے بھرپور شرکت کی۔ روڈ شو میں قونصل جنرل آف پاکستان سردار عدنان رشید اور بینک آف پنجاب کی انتظامیہ نے شرکاء کو روشن ڈیجیٹل اکاؤنٹ کے بارے میں تفصیلی بریفنگ دی۔ اس موقع پر بینک آف پنجاب کے نوفل داؤد نے اوورسیز پاکستانیوں کو بتایا کہ اسٹیٹ بینک اور حکومت پاکستان کی ضمانت پر ایسے فیچرز متعارف کرائے گئے ہیں جو دنیا کو ایک بہتر جگہ بنائیں گے۔ دنیا بھر میں مقیم اوورسیز پاکستانی آسان اقساط پر قرض اور گھر کی بنیاد پر اکاؤنٹ کی سہولیات سمیت دیگر بہت سی سہولیات سے مستفید ہو سکتے ہیں اور اس سے سمندر پار پاکستانیوں کے سرمائے کی بھی بچت ہوگی اور پاکستان میں معاشی ترقی اور خوشحالی بھی آئے گی۔ دیگر شرکاء نے کہا کہ یہ حکومت پاکستان اور اسٹیٹ بینک کا ایک اچھا اقدام ہے اور اس سے بیرون ملک مقیم پاکستانیوں کا سرمایہ کاری کے حوالے سے حوصلہ مزید بلند ہوگا اور پاکستان میں ترقی کے دور کا آغاز ہوگا۔ اظہر محمود، سابق حکومتی مشیر راجہ فضل الرحمان، چوہدری شوکت، بوبی، عرفان بٹ سمیت برادری کی بڑی تعداد نے شرکت کی۔



































